Монгол улсын Сансрын хөгжлийн ирээдүй
Оршил
1957 оны 10-р сарын 4-нд - Дэлхийн анхны хиймэл дагуул сансарт хөөрлөө. 1961 оны 4-р сарын 12 – Хүн анх сансарт нислээ, Ю.А.Гагарин.
1981 оны 3-р сарын 22 – Монгол хүн сансарт нислээ, Ж.Гүррагчаа. Энэ нислэгийн хүрээнд олон арван эрдэм шинжилгээний ажил хийгдэж, туршигдсан учир бид сансрын шинжлэх ухааны туршлага, мэдлэг тухайн үедээ олж авч байсан билээ. Эдгээр сансрын шинжлэх ухааны мэдлэг олж авцгаасан хүмүүс одоо хүртэл амьд юм. Эдгээр хүмүүсийн мэдлэг чадварт тулгуурлан, тэднийг ашиглан бид залуу үедээ энэ мэдлэг, мэргэшил, чадварыг өвлүүлэн үлдээх ажлыг зохион байгуулах хэрэгтэй.
Эдгээр боловсон хүчин дээр тулгуурлан бид Монгол улсын Сансрын хөгжлийн хөтөлбөртэй болох ёстой.
Сансрын уудмыг эзэмших нь
Сансрын уудмыг эзэмших асуудал аль ч улс орныг тойрохгүй, бүх улс орны өмнө тулгарах асуудал. Ялангуяа, сүүлийн үеийн хөгжлийн эрчим, үе шат үүнийг шаардаж байгаа юм. Бидний сайн мэдэх интернэт, мэдээллийн технологиос эхлээд л сансрын хөгжлийг зайлшгүй шаардлагатай, амин чухал болгож байгаа бөгөөд нөхцөл байдал шаардаж байна. Нөгөө талаас эх дэлхий, эх орноо сансрын уудмаас судлах нь асар их эдийн засгийн ашиг тус өгдөг юм. Жишээ нь, нэгд, холбоо, мэдээлэл, интенэт талдаа бид асар их мөнгийг холбооны хиймэл дагуулын сувгийн түрээсэнд алдаж байна. Хоёрт, кадастрын зураглал хийхэд л, нарийн ялгах чадвартай хиймэл дагуулын мэдээтэй бол асар их хүч, хөдөлмөр, цаг зав, мөнгө санхүүг хэмнэх юм.
Сансрын хөгжлийн техник, технологийг Монгол улсад оруулж ирсэнээр техник, технологийн үсрэнгүй хөгжил бий болдог бөгөөд үүнийгээ дагаад улсын болон хувийн хэвшлийн үйлдвэр, аж ахуй, үйлчилгээний байгууллагууд асар хурдан хөгжиж ирдэгийг АНУ-ын Сансрын хөгжил харуулж байна.
Монгол улсын хувьд сансрын уудмыг эзэмших хоёр чиглэл байна:
1. Холбооны хиймэл дагуулын чиглэл
2. Дэлхийгээ судлах хиймэл дагуулын чиглэл
- Холбооны хиймэл дагуул – орчин үеийн хөгжлийн төвшин үүнийг шууд амьдралд хэрэгжүүлэхийг шаардаж байгаа. Зөвхөн эдийн засаг талаасаа л харахад, түрүүн дээр цухас дурдсан, маш их хөрөнгө, мөнгийг бид холбооны хиймэл дагуулын түрээсэнд алдаж байгаа. Бид холбооны хиймэл дагуул хөөргөж, мэдээж хэрэг аль нэг хөгжилтэй оронтой хамтран, чадвал, интернэт, холбоо, телевизээс авахуулаад маш салбарын ашиглалт хямд тусаж, нийт ард бүгдээрээ ашиг шимийг нь хүртэх юм.
- Дэлхийгээ судлах хиймэл дагуул – хэрэв бид орчин үеийн өндөр ялгах чадвар бүхий ийм хиймэл дагуулыг, аль нэг хөгжилтэй улстай хамтран хөөргөж чадвал эдийн засгийн маш их ач холбогдолтой бөгөөд түүнийг дагасан асар их дам үр ашигийг авчирах нь дамжиггүй юм. Газрын зураглалаас авахуулаад, байгалийн нөөц (ой модоо яс тас тодорхойлчихно, тариа тарьсан газраа бүрэн дүүрэн тоолчихно г.м.) гээд цаашилбал батлан хамгаалахад гээд шууд ашиглах салбарууд байна. Дам замаар улс орны хөгжилд асар их түлхэц өгөх салбар билээ.
2010 оны 4 дүгээр сар 19
